silence

مكنتش عارف ابدأ الموضوع ازاى ومنين لقيت انسب حاجة هى الصورة اللى حطيتها دى
من كام يوم كده جه فى بالى كذا حاجة مرتبطة بموضوع واحد وافتكرت مواقف كتير اوى مريت بيها وكان اساسى انى اتكلم فيها بس اكتشفت انى حتى ملمحتش بيها ولا جبت سيرتها للانسان اللى تخصه الحاجات دى ... مش عارف ازاى حصل كده وليه
هو يمكن مش من عادتى لما اكون متضايق انى اسكت او مقولش اللى مضايقنى لأى حد .... يعنى على الاقل بحس انى ارتاحت شوية
المشكلة بقى انى فكرت كتير ازاى مقولتش الحاجات دى وليه !!! لقيت اجابة ضايقتنى جدا وقولت يارب ميكونش ده السبب
قولت حاجة من اتنين اما متكلمتش فيها عشان معملش مشكلة بينى وبين الشخص اللى تخصه الحاجات دى او انى مكنتش عايز افتكر المواقف دى ولا اتكلم فيها ودى بقى ضايقتنى جدا عشان حسستنى بضعف اول مرة احسه فى نفسى
هوجاب فايدة اكتر من انى كنت اتكلم
فعلا لقيت ولاول مرة احس بيها يمكن مش دى الاسباب الحقيقية بس دى اقرب حاجة شوفتها مقاربة يعنى ... ما هو ساعات كتير الواحد بيعمل حاجات كتير وبيتصرف فى مواقف كتير ومبيقباش عارف عمل كده ليه وازاى !!!

نيجى للمهم بقى واللى انا عامل البوست ده عشانه
اول مرة احس ان سكوتى ده يعنى فؤايد كتير للصمت
ساعات بيكون اجابة من غير ما تعمل مشاكل
ساعات اكتر بيُكسب صاحبه احترام لدى الشخص اللى قدامه
ساعات بيديلك فرصة اكبر بكتير فى ان انت تفكر فى الموقف اللى انت فيه ويغير تصرفك فى مواقف كتير
اكتر حاجة حسيت بيها بقى انه خلانى اعيد التفكير فى قرارات ومواقف كتيــــــــــــــــــر مش عارف حصلت منى ازاى !!!!
حاجات منها ايجابية بس لقيت حاجات سلبية اكتر
كمان خلانى اعرف طبيعة ناس كتــــــــير وطريقة واسلوب تفكيرهم واستغربت اوى انى معرفتش الحاجات دى من معاملتى وكلامى الكتير معاهم
كمان اكتشفت حاجة مهمة .... هو يمكن السكوت ده بيولد شعور بالغيظ للشخص اللى قدامك بالتالى بيتكلم ويقول حاجات كتير جواه يمكن انت قاصد تعرفها بسكوتك ... ويمكن ان فوجئت بيها... المهم فى الاخر استفدت لما عرفتها

اممممممممممممممممم مش عارف حاسس كده ان افكار الموضوع مش مترتبة ومتهيألى كمان معرفتش اقول كل اللى جوايا واللى كنت ناوى اقوله .... مش عارف ايه جرى لما جيت اكتب الموضوع

//تحديث للبوست//

فى نوع مهم اوى من الصمت ... اممممم انا مش عارف ده ايجابى ولا سلبى
بس هو موجود وفى مواقف كتير بيكون ايجابى وساعات برده بيبقى سلبى
لكن عموما هو ايجابى ولا سلبى ؟؟ مش عارف
النوع ده بقى انت الللى مش بتدى فرصة للى قدامك انه يتكلم ويقول اللى جواه
يمكن عشان مقتنع انه كلامه مش هيغير فيك حاجة
يمكن برده عشان انت مش عايزه تسمعه اصلا
يمكن عشان مهما قال انت مش هتقتنع بـ اللى بيقوله وده طبعا عشان انت متاكد ومقتنع باللى جواك
ربما بقى انت معتش عندك اى استعداد انك تسمع اى حد ولا تقتنع باى حاجة غير اللى انت شايفها ...

الاخيرة دى اصعب واحدة وعلى فكرة معتقدش انها بتبقى موجودة فى اى حد من نفسها او وليدة صدفة واحدة او موقف واحد بالعكس ده لما حد بيوصل للمرحلة دى بيكون تعب كتير من اللى قدامه وقابلته مواقف كتير صعبة اثرت عليه وعلى تفكيره كتيــــــــر
بس يا ترى بقى هيقدر يرجع زى ما كان ولا هيفضل كده ؟؟!!